Қазақстанда елде уақытша тұруға рұқсат алған шетелдіктер саны 8,6%-ға өсті. Бұл туралы LS-ке ІІМ-де хабарлады.
Ведомствода 2022 жылғы қаңтар-ақпанда бұл рұқсатты 40,3 мың шетелдік азамат (2021 жылғы қаңтар-ақпанда 37,1 мың шетелдік) алғанын түсіндірді.
Оның 10,3 мыңы – Ресей азаматтары. Бұл өткен жылдың сәйкес кезеңімен салыстырғанда 11,8%-ға артық.
Наурыз айындағы деректер әлі жоқ.
Сонымен қатар, Head Hunter компаниясында Қазақстанның еңбек нарығы Ресейге қатысты экономикалық санкциялардың енгізілуіне байланысты өзгерістерді әлі сезбегенін атап өтті. Ресейліктер тарапынан аномалды белсенділіктің өсуі байқалмайды.
"Қазіргі уақытта біз жұмыс берушілердің жоғары белсенділігі мен бос орындар санының өсуін көріп отырмыз. Қазақстандық бизнеске кадрлар керек. Бір ашық бос орынға үш адам келеді, бұл арақатынасты нарық үшін қалыпты жағдай ретінде сипаттауға болады", – деп хабарлады компанияда.
Естеріңізге сала кетейік, 25 ақпанда Ресей Украинаға басып кірді, бұл кейіннен халықтың көрші елдерге кетуіне әкелді. Сонымен қатар, көрші елде Ресей рублінің күрт құнсыздануы орын алып, бұл теңгеге әсер етті. Мәселен, Қазақстанның ұлттық валютасы 2022 жылдың басынан бері 77 бірлікке әлсіреді. 16 наурызда АҚШ валютасының сауда-саттығы $1 үшін 509 теңге белгісінде жабылды. Теңгені қолдау үшін Ұлттық банк интервенция жасады.
Сонымен қатар, Ресейдің іс-әрекетіне байланысты Қазақстанда ұн, ет, жұмыртқа бағасының өсуі күтiлуде, қант тапшылығын болдырмау үшін бірқатар жұмыс атқарылуда. Құрылыс материалдары, тұрғын үй, көлік қымбаттады. Қазақстан транзиті қайта бағдарланбақ.
