Қазақстанда қаржы пирамидаларын жарнамалайтын вайнерлер мен әртістер үшін қылмыстық жауапкершілік енгізіледі, деп хабарлайды LS.
Мәжіліс кулуарында палата спикері Ерлан Қошанов журналистердің қаржы пирамидалары туралы сұрақтарына жауап берді.
"Депутаттар тиісті заң жобасын әзірледі. Бүгінгі таңда арнайы топ жұмыс істейді. Менің ойымша, жақын арада біз бұл құжатты қабылдаймыз. Қаржы пирамидаларын жарнамалайтын әртістер мен вайнерлердің әрекеттері үшін қылмыстық жауапкершілікті белгілейміз, өйткені бұл алаяқтық схема", - деді ол.
Қошанов сондай-ақ, алаяқтардың қызметінен зардап шеккен Нұр-Сұлтандағы өзін-өзі өртеп жіберген әйелдің қайғылы оқиғасы туралы білетінін айтты.
"Қаржы пирамидалар бүгінде барлық өңірлерде үлкен проблема болып отыр. Себебі адамдар танымал вайнерлер, әртістер, қоғамдық пікір көшбасшылары жарнамалап жатқан дүниелерге сенеді. Адамдар соңғы ақшаларын салып, соңынан қиын жағдайға тап болып жатқанын көреміз", - деп түйіндеді ол.
Бұған дейін, ІІМ-де танымал блогерлер жарнамалаған қаржы пирамидалары туралы айтылды.
Естеріңізге сала кетейік, 2021 жылы 31 мыңнан астам азамат қаржы пирамидасының құрбаны болды, келтірілген шығын сомасы 54 млрд теңгеден асты.
