Ұлытау облысында бес ірі инвестициялық жоба іске асырылып жатыр. Бұл туралы LS-ке өңір әкімдігінде хабарлады.
Бірінші жоба – жылу электр орталығында (ЖЭО) 60,5 млрд теңгеге бу-газ қондырғысын салу. Нысанды биыл пайдалануға беру жоспарланып отыр.
Екінші жоба – 70 млрд теңгеге жаңа күкірт қышқылы цехы. Құрылыс жұмыстары 2022 жылы басталған.
Үшінші жоба – молибден кенін өндіру және өңдеуге арналған тау-кен байыту комбинатының құрылысы.
Төртінші жоба – "Батыс Қаражал" кен орнын игеру. Жобаны 2028 жылдың соңына дейін аяқтау жоспарланып отыр. Инвестиция көлемі 210 млрд теңгені құрайды. Мұнда темір кені өндірілетін болады.
Бесінші жоба – көмір байыту фабрикасын салу. Жоба аясында көмірді байыту өндірісі іске қосылады.
"Аталған жобаларды жүзеге асырып жатқан барлық компания Ұлытау облысында тіркелген", – деп хабарлады әкімдікте.
Бұған дейін, LS редакциясы Ұлытау облысында жыл соңына дейін құны 151 млрд теңге болатын 10 жоба іске қосылатынын жазған еді.
