Қазақстанда ет экспортына шектеулер енгізу мәселесі қарастырылуда. Бұл жөнінде LS-ке "Атамекен" ҰКП төраға орынбасары Тимур Жаркенов мәлімдеді.
Оның сөзінше, аталған ұсыныс ведомствоаралық комиссия (ВАК) отырысында талқыланған.
"Көршілес елдерде ет бағасының күрт қымбаттап, тапшылықтың пайда болуына байланысты олар Қазақстаннан өнім сатып алуда. Ел ішінде қиындық туындамауы үшін қазір ет экспортына шектеу енгізу мәселесі қаралуда", – деді Т. Жаркенов.
ҰКП өкілі бұл мәселенің оңай шешілмейтінін айтты. Себебі негізгі басымдық – бағаның тұрақтылығын сақтау және қазақстандықтардың сұранысын қанағаттандыру. Сонымен бірге ол кәсіпкерлердің мүдделерін де ескеру қажет екенін жеткізді. Кәсіпкерлер әділ бағаның қалыптасуын және өнімді экспорттауға мүмкіндік берілуін күтуде. Барлық осы жайттар ВАК қарауына ұсынылды.
"Дұрыс әрі теңгерімді шешім қабылдау үшін көршілес мемлекеттердегі және ел ішіндегі ахуал жан-жақты талданатын болады", – деп түйіндеді Т. Жаркенов.
Салалық одақ өкілі Мақсұт Бақтыбаев Қазақстанда ірі қара мал басы азайып, соның салдарынан тапшылық пен бағаның өскенін айтты. Оның сөзінше, ресми деректерде бағаның қымбаттауы экспорт көлемінің артуымен түсіндірілгенімен, бұл шындыққа жанаспайды. Сарапшының мәліметінше, жыл сайын шетелге небәрі 15 мың тонна сиыр еті жөнелтіледі, бұл ішкі тұтынудың бар болғаны 3%-ын құрайды. Сондықтан мұндай көлем бағаның айтарлықтай көтерілуіне ықпал ете алмайды. Оның пікірінше, түйткілдің түпкі себебі – мал басының жеткіліксіздігі.
Өз кезегінде ауыл шаруашылығы министрлігі елде мал басының азайғанын жоққа шығарды. Ведомство LS-ке берген мәліметінде еттің қымбаттауын жемшөп, жанар-жағармай және коммуналдық қызметтердің қымбаттауымен байланыстырды.
Бұған дейін, LS редакциясы Қазақстандағы ет бағасының өсуін инфографикада көрсеткег болатын.
