Қазақстандық өндірушілер Ресей импортына байланысты жергілікті нарықта да бәсекеге қабілетсіз болып отыр. Бұл туралы мәжіліс депутаты Айдарбек Қожаназаров мәлімдеді, деп хабарлайды LS.
Оның айтуынша, Қазақстанда ішкі нарықты импорттан қорғау әлсіз.
"Бүгінде сауда министрлігінің техникалық реттеу саласындағы әлеуеті толық көлемде пайдаланылмайды. Өткен жылдың өзінде Россельхознадзор 15 қазақстандық тауар өндірушіге қатысты 22 шектеу енгізді. Біздің компаниялар тіпті өз нарықтарында да бәсекеге қабілетсіз болып келеді. Кәсіпорындар сүтті сатып алу бағасын литріне 250 теңгеден 160 теңгеге дейін төмендетті. Павлодар және Шығыс Қазақстан облыстарында жазғы уақытта зауыттар сүт сатып алуды мүлдем тоқтатты. Өйткені, қайта есептегенде, ресейлік құрғақ сүтті кг үшін 1 мың теңгеден сатып алғанда, дайын сүттің бір литрінің құны 120 теңгені құрайды", - деді ол.
Депутаттың айтуынша, бес жыл ішінде Ресейден импорт алты есе өсті.
"Бір ғана серіктестік бір айда 190 тонна құрғақ сүт импорттады, одан 1,5 мың тонна қалпына келтірілген сүт алуға болады. Осы тәсілмен біз бірқатар кәсіпорындарды банкротқа ұшыраттық және көрші мемлекетті тамақтандырып жатырмыз. Бұл ретте мемлекеттік қолдау шаралары фермерлерге қол жетімді емес, өйткені несиелер бойынша пайыздық мөлшерлемені субсидиялауға арналған ақша толық бөлінбейді. Тиісінше, барлық фермерлердің қарыздарын азайтуға мүмкіндік жоқ. Қаражат II тоқсанның басында аяқталады. Қазір 36,9 млрд теңгеге 1,7 мың өтінім төленбеген күйінде қалып отыр. Уәде етілген қолдауға қарамастан, фермерлер бұл несиелер бойынша айналым қаражатының жылдық 24% құрайтын толық мөлшерлемені төлеуге мәжбүр. Қаржы министрлігі дереу шешім қабылдауы керек", - деді Қожаназаров.
