Еліміздегі бес банк қаржылық тұрақтылық пен сауықтыру бағдарламасы аясында мемлекеттен алған 1,4 трлн теңгені қайтаруы тиіс. Бұл туралы Қаржы нарығын реттеу және дамыту агенттігі LS-ке хабарлады.
Агенттіктің мәліметінше, аталған қаражат келесі банктерге бөлінген: БЦК – 30 млрд теңге, Еуразиялық банк – 150 млрд теңге, RBK банкі – 214,1 млрд теңге, Нұрбанк – 46,8 млрд теңге, Jusan Bank (Alatau City Bank) – 1 трлн теңге.
"Мемлекеттен қолдау ретінде бөлінген қаражат банктер тарапынан келісімшарт талаптарына сай қайтарылуы тиіс. Осыған байланысты агенттік пен Ұлттық банк банктердің қарызын өтеуін жеделдетуге бағытталған ынталандыру тетіктерін іске асыруда", - делінген ресми жауапта.
Агенттік 2022 жылдың желтоқсанынан бастап балансында мемлекеттік қаражат, Ұлттық қордан, Ұлттық банк пен оның еншілес ұйымдарынан алынған қаражат бар банктерге дивиденд төлеуге заң жүзінде тыйым салынғанын еске салды.
2023 жылғы қаңтардан бастап мемлекеттік қолдау алған банктерге бірқатар шектеулер енгізілді: енді олар акциялар бойынша кіріс есептей алмайды және бұл табысты мемлекеттен алынған қаражат есебінен төлей алмайды. Сонымен қатар, егер мемлекеттік қолдауды шегергеннен кейін банктің меншікті капиталы теріс болса, дивиденд төлеуге тыйым салынады. Акционерлік табысты төлеу тек мемлекеттік көмектің бір бөлігін мерзімінен бұрын қайтарған жағдайда мүмкін болады.
Айта кетейік, БЦК банк 30 млрд теңге көлеміндегі мемлекеттік көмекті осы айда қайтаруды жоспарлап отырғанын мәлімдеді.
Бұған дейін, Ұлттық банк мемлекеттік көмекті қайтаруды кешіктіріп жатқан банктерге қатысты қосымша шектеулер енгізуге дайындалып жатқаны белгілі болған еді.
