Алдағы 10 жылда Қазақстанның еңбек нарығында білім беру мен өңдеу өнеркәсібі негізгі бағыттардың біріне айналады. Бұл туралы LS-ке еңбек және халықты әлеуметтік қорғау министрлігінде хабарлады.
Министрліктің дерегінше, 2035 жылға дейін ел экономикасына шамамен 2,7 млн маман қажет болады.
Ең жоғары сұраныс білім беру саласында байқалады – 408 мың адам (15,1%). Одан кейін өңдеу өнеркәсібі – 271 мың адам (10%), ал сауда саласында – 228,9 мың адам (8,4%) қажет болады.
Сондай-ақ кадр тапшылығы денсаулық сақтау саласында – 220,1 мың адам (8,15%), ауыл шаруашылығында – 214,2 мың (7,9%), құрылыс саласында – 201,5 мың адам (7,4%) деңгейінде күтіледі.
Қосымша сұраныс электр және энергиямен қамту саласында – 52,1 мың адам (2%), ал ақпарат және байланыс саласында – 42,5 мың адам (1,6%) деңгейінде қалыптасады.
Қалалар арасында ең көп жұмыс орны Алматыда ашылады – 425,2 мың. Астанада – 241,1 мың, ал Шымкентте – 130,4 мың маманға сұраныс болады.
Өңірлер ішінде көш бастап тұрғандар Қарағанды облысы – 175,8 мың, Түркістан облысы –161,4 мың, Алматы облысы – 160,1 мың.
Бұған дейін, LS редакциясы Қазақстанда кейбір мамандықтар жойылып, олардың орнына жаңа кәсіп түрлері пайда болатынын хабарлаған болатын.
__wm.jpg)
