Алматыда құрылыс мәселесін шешудің жолы табылды. Бұл туралы индустрия және инфрақұрылымдық даму министрлiгiнде айтты, деп хабарлайды LS.
Сенаттың жалпы отырысы барысында депутат Ольга Булавкина тиісті рұқсаттарды алмай салынған жылжымайтын мүлік мәселелерін шешу үшін қаланың ерекше мәртебесі туралы Заңға өзгерістер енгізу ұсынылатынын айтты.
"Түзетулер атқарушы органда жылжымайтын мүлікті ресімдеу мәселелерін қарау бойынша комиссия құруды көздейді. Рұқсат құжаттарынсыз салынған жылжымайтын мүлікті тіркеу мәселесі тек осы қалаға ғана емес, сонымен қатар басқа да ірі елді мекендерге қатысты. Сондықтан еліміздің басқа қалаларында мұның қалай шешілетіні туралы сұрақтар туындап отыр. Бұл тәсіл рұқсат етілмеген ғимараттардың жаппай салынуына әкелмейді ме?"- деді ол.
Өз кезегінде индустрия және инфрақұрылымдық даму министрі Қайырбек Өскенбаев өз еркімен салынған құрылыстарды заңдастыру және оларды бұзу туралы мәселе заңнамамен реттелгенін, ол сот тәртібімен шешілетінін хабарлады.
"Алматының проблемасына келсек, соңғы уақытта қалаға бірқатар аудандар қосылды, ал ауылдық елді мекендерде заңдастырылмаған құрылыстар жүргізiлуде. Мәселен осындай 14 мыңға жуық құрылыс жүрiп жатыр. Егер басқа қалаларда да солай болса, онда біз ондаған, тіпті жүздеген жағдайлар туралы айтып отырмыз. Бұл жұмысты бас жоспарға сәйкес атқару керек",- деп жауап берді ол.
Алайда, министр егер бұл өз еркімен салынған құрылыстар бас жоспарда белгіленген желілерді, жолдарды жүргізу, қаланың тыныс-тіршілігін қамтамасыз ететін басқа да объектілерді салу айқындалған жерлерде болса, онда осы жерлерді алып қою туралы шешім қабылданатынын нақтылады.
"Алдымен бұл тәжірибенің қалай өтетінін бақылаймыз. Бірінші кезекте бiз Арыс бойынша үйлерді қалпына келтіре бастадық, олардың көбісі заңдастырылмаған болып шықты. Бірақ ол жерде біз әкімдікпен жедел түрде жұмыс істедік. Мұндай проблемалар бар, осы тәжірибенің негізінде мүмкін қандай да бір жеңілдетілген алгоритм әзірлеймiз",- деп түсіндірді ол.
Заңнамаға енгізілген түзетулермен мүлікті заңдастыру мәселелерін шешу үшін алда жылжымайтын мүлікті ресімдеу бойынша комиссия құрылмақ.
Бұған дейін сенат "Қазақстан Республикасының кейбір заңнамалық актілеріне электр энергетикасы, энергия үнемдеу және энергия тиімділігін арттыру, жер қойнауын пайдалану, жергілікті мемлекеттік басқару және мемлекеттік шекара мәселелері бойынша өзгерістер мен толықтырулар енгізу туралы"заң жобасын бірінші оқылымда қабылдады.
