Қазақстан-өзбекстан орталығына инфрақұрылым құру үшін 27 млрд теңге инвестиция салынады, деп хабарлайды LS.
Сауда және интеграция министрі Арман Шаққалиев мәжіліс депутаттарына "Орталық Азия" халықаралық өнеркәсіптік кооперация орталығының қандай болатынын айтып берді.
"Сыртқы және ішкі инфрақұрылымға 27 млрд теңге бөлінеді, оны бюджеттен тыс қаражат есебінен салу жоспарланған. Түркістан облысының әкімдігі ашық конкурс өткізіп, негізгі инвесторды анықтады. Қазіргі уақытта инвестор жобалық-сметалық құжаттаманы әзірлеумен айналысуда. Техникалық және құрылыс жұмыстары 2026 жылдың IV тоқсанында аяқталады, ал ресми ашылу 2027 жылдың бірінші жартысына жоспарланған", – деп атап өтті министр.
Оның айтуынша, орталық Қазақстандағы "Атамекен" және Өзбекстандағы "Гулистан" бақылау-өткізу бекеттерінің маңында орналасады. Онда өндірістік алаңдар, қоймалар және көлік инфрақұрылымы болады. Бұл жүк тасымалдау уақытын қысқартуға, логистикалық шығындарды азайтуға, жеткізу тізбегіндегі делдалдар санын кемітуге және өнімнің түпкілікті құнын төмендетуге мүмкіндік береді деп күтілуде.
Орталықтың жалпы аумағы 100 га құрайды, оның 50 гектары – Қазақстанға, ал қалған 50 гектары – Өзбекстанға тиесілі. Бұл аумаққа өңірлік индустриялық аймақ мәртебесі беріледі.
Депутаттардың сұрақтарына жауап бере отырып, Арман Шаққалиев екі елдің вице-премьерлері қол қойған $7 млрд көлеміндегі жобалар жоспары дайын екенін мәлімдеді.
