Қызылорда облысында жалпы құны 25 млрд теңге болатын тағы үш өндіріс ошағы ашылмақ. Бұл туралы LS-ке өңірлік әкімдікте хабарлады.
Шиелі ауданында 20,3 млрд теңгенің ауыл шаруашылығы өнімдерін терең өңдеу кешені салынады. Кәсіпорында сағатына 14 мың л шырын өндiрiсiн, тәтті консервіленген өнімнің сағатына 10 мың банка өндірісін жолға қояды. Сондай-ақ, сағатына 5 мың кг кептірілген жемістер мен 5 мың банка джем шығарылмақ.
Бұдан басқа, 4,5 млрд теңгеге жоңышқа өндірісі салынады. Бұл жобаның қуаттылығы 120 мың тоннаны құрайды.
Сонымен қатар, Жалағаш ауданында 500 млн теңгеге күріш сабанынан целлюлоза шығаруды жолға қою жоспарлануда. Құрылыс жұмыстары да осы жылы басталады деп күтiлуде. Ақпаратқа сәйкес, қазіргі уақытта жобаны іске асыру үшін жер учаскесі рәсімделіп жатыр. Өндіріс қуаттылығы 2,88 мың тонна крафт қағазын құрайды.
Мемлекеттік құрылымдардың мәліметтері бойынша, бұл жобалар 2021-2025 жылдары іске асырылатын болады. Жалпы құны – 25,3 млрд теңге. Олардың басталуы 258 жұмыс орнын ашады.
Сонымен қатар, әкімдікте облыста шетелдік инвесторлармен тағы екі жаңа өндіріс ашылуы мүмкін екенін атап өтті. Атап айтқанда, чех компаниясы сыра, сусындар, шырындар шығаруға, ал моңғол тарапы тері мен жүнді қайта өңдеуге мүдделі. Олардың құны белгiсiз.
Бұған дейін LS, өңірде құны 554 млрд теңгеден асатын 26 жоба іске асырылатынын жазған болатын. Олардың ашылуы 7 мыңға жуық жаңа жұмыс орындарын құруға мүмкіндік береді. Бұдан басқа, шыны зауытының айналасында кемінде сегіз өндіріс құру жоспарлануда. Мысалы, шыны талшық, айна, шыны ыдыс және ыдыс өндіру бойынша үш жобаны дайындау басталып кеттi.
