Қазақстанда құрылысты аяқтамайтын құрылыс салушылар үшін қылмыстық жауапкершілік енгізу ұсынылды, деп хабарлайды LS.
Сенатор Бекболат Орынбасаровтың айтуынша, Ақтауда 10 үйдің тұрғындары аяқталмаған тұрғын үй кешеніне қоныстанған.
"Алматы мен Астанада да осындай жағдайлар бар. Құрылыс салушылар үшін әкімшілік құқық бұзушылық туралы Кодекс бойынша жауапкершілік көзделген. Алайда, кейбір компаниялар айыппұлдарды елемейді. Нәтижесінде аяқталмаған үйлерге қоныстанған азаматтар әкімдіктерге хабарласып, инженерлік желілерді – су, электр және кәріз желілерін қосуды талап етеді. Орындалмаған жағдайда олар митингілерге шығады және мұнда әлеуметтік қақтығыстар туындайды. Осындай компанияларды қылмыстық жауапкершілікке тарту бойынша өз ұсыныстарыңызды білдіріңіз", - деді ол индустрия және инфрақұрылымдық даму министрлігінің өкілдеріне сөйлеген сөзінде.
Өз кезегінде индустрия және инфрақұрылымдық даму министрлігінің вице-министрі Алмаз Ыдырысов Қазақстанда жосықсыз құрылыс салушылар мәселесі өткір екенін атап өтті. 2022 жылы осындай бұзушылықтардың 228 фактісі анықталып, компаниялар әкімшілік жауапкершілікке тартылған. Алайда, оның пікірінше, бұл шара жеткіліксіз.
"Осындай бұзушылықтар үшін бақылау мен жауапкершілікті күшейту қажет деген бөлікте сізбен толық келісемін. Біз айыппұл санкцияларын қатаңдату және ұлғайту мәселесін пысықтайтын боламыз. Ал қылмыстық жауапкершілікті қарастыруға қатысты мәселе мүдделі мемлекеттік органдармен бірлесіп қосымша пысықтауды талап етеді. Бақылауды арттыру бөлігінде қосымша мемлекеттің де қатысуы көзделетін болады", - деп түйіндеді ол.
Бұған дейін, Қазақстанда үлескерлік тұрғын үй құрылысын бақылауды күшейту жоспарланып отырғаны хабарланған болатын.
