Қазақстан Ресей мен Беларусьтен әкелінетін көліктерге арналған утильдік алымды көтеруді жоспарлап отыр. Бұл туралы LS-ке өнеркәсіп және құрылыс министрлігінде мәлімет берді.
Министрліктің хабарлауынша, жобаланған бұйрық бойынша көліктерді Қазақстанға Ресей мен Беларусьтен әкелгенде утильдік төлемнің мөлшері айтарлықтай өседі.
Көліктің түрі, тағайындалуы және қозғалтқыш көлеміне байланысты утильдік алым 14,6-тен 38,8 есеге дейін өсуі мүмкін.
Дегенмен, министрлік түсіндіргендей, үшінші елдерден, сондай-ақ Армения мен Қырғызстаннан әкелінетін көліктерге утильдік төлем өзгермейді, көліктің түрі мен қозғалтқыш көлемі маңызды емес.
Министрлік утильдік төлемді есептеу формуласын былай түсіндірді:
Негізгі ставка × Көбейту коэффициенті, мұндағы негізгі ставка 50 МРП-ға тең, 2026 жылы бұл 216 250 теңгені құрайды, ал коэффициент елге байланысты қолданылады.
Мысалы, М1 санатындағы, қозғалтқыш көлемі 1 000 см³-ке дейінгі көліктер үшін утильдік алым мынадай болады:
- Армения, Қырғызстан және ЕАЭО-ға кірмейтін елдерден әкелінгенде – 324 375 теңге;
- Беларусь пен Ресейден әкелінгенде – 4 757 500 теңге.
Қазіргі кезде Ресей мен Беларусь үшін утильдік төлем барлық елдер сияқты – 324 375 теңге.
Министрлік бұл шараларды тең бәсекелестік жағдайын қалыптастыру мақсатында қабылдап отырғанын және өзгерістердің күшіне ену мерзімі заңдық рәсімдерге байланысты болатынын түсіндірді.
Бұл түзетулер Қазақстанда өндірілетін, Армениядан, Қырғызстаннан және үшінші елдерден әкелінетін көліктердің бағасына әсер етпейді. Ал Ресей мен Беларусьтен келетін көліктер айтарлықтай қымбаттайды.
2025 жылы Беларусьтен Қазақстанға 31 көлік, оның ішінде бір жеңіл көлік, әкелінген, ал Ресейден жеткізілген көліктер саны 17 мыңнан асқан.
"Қазақстан утильдік алымды мемлекет, бизнес және тұтынушы мүддесін ескере отырып қалыптастырады, отандық өндіріс пен импорт үшін болжамды режим сақталады", – деп мәлімдеді министрлікте.
Министрлікте Қазақстан көптеген бағыттағы ынтымақтастықта теңгерімді және ашық экономикалық саясат ұстанатынын, шара тек утильдік төлем мөлшерін өзгертуге ғана бағытталмағанын айтты.
Министрліктің болжамынша, Ресей мен Беларусьтен әкелінетін көліктердің орнына үшінші елдерден ресми жолмен әкелінетін көліктер келсе, бюджет қосымша ҚҚС пен акциз кірістерін алады.
Сонымен қатар, қазақстандық өндірушілер мен заңды импорттаушылардың сатылымы артады, бұл экономикалық мультипликативтік әсерге ие болып, табыстар мен салық түсімін арттырады.
Бұған дейін, LS редакциясы Ресей мен Беларусьтен келетін көліктерге утильдік алымды көтерудің салдары туралы хабарлаған болатын.
