Қазақстанда шұжық пен ет өнімдерінің өндірісі артып келеді, алайда бағаның өсуіне байланысты ішкі тұтыну төмендеген, деп хабарлайды LS.
2025 жылдың қаңтар-қазан айларында отандық кәсіпорындарда 65,2 мың тонна шұжық және ет өнімдері өндірілді. Бұл 2024 жылдың осы кезеңімен салыстырғанда 7,8%-ға көп.
Сонымен қатар шұжық және осыған ұқсас ет өнімдерінің экспорты әлі де мардымсыз күйде. Аталған кезеңде шетелге 491,8 тонна өнім ($1,2 млн) жөнелтілген, бұл өткен жылмен салыстырғанда 5,5%-ға аз.
Экспорттың басым бөлігі Ресейге бағытталған – 474,8 тонна, бұл 3,4%-ға артық. Сонымен қатар өнімдер Қырғызстанға 14,7 тонна көлемінде жөнелтілді (1,7 есеге аз). Ал БАӘ-не 1,3 тонна, Тәжікстанға 1 тонна және Кувейтке 41,7 кг жеткізілген. Айта кету керек, аталған соңғы үш бағыт бойынша 2024 жылдың қаңтар-қазан айларында экспорт тіркелмеген.
Импорт көлемі 10%-ға азайғанымен, ол экспорт көрсеткіштерінен айтарлықтай жоғары болып қалып отыр – 35,7 мың тонна немесе $112,6 млн.
Шұжық өнімдері негізінен Ресейден (25 мың тонна, -17,7%) және Беларусьтен (9,4 мың тонна, +10,3%) әкелінген. Бұған қоса, импорт географиясы Қырғызстаннан бастап Өзбекстан, Канада, Украина, Түркия, Италия, Франция және Грекияға дейін кеңейді.
Ішкі нарықта 2025 жылдың қарашасында қайнатылған шұжықтың орташа бағасы 1 кг үшін 3,3 мың теңге болды. Бұл 2024 жылдың қарашасымен салыстырғанда 13%-ға жоғары. Ал жартылай ысталған шұжық 10,5%-ға қымбаттап, 4 мың теңгеге жетті.
Бағаның өсуі тұтыну көлеміне де әсер етті. 2025 жылдың III тоқсанында бір қазақстандық орта есеппен 636 г қайнатылған шұжық тұтынған, бұл өткен жылмен салыстырғанда 6,6%-ға аз. Ал жартылай ысталған шұжықты тұтыну көлемі айтарлықтай өзгермей, 1 кг деңгейінде қалды (+0,2%).
