Қарағанды облысында ресейлік инвестицияның қатысуымен жаңа зауыт салынып жатыр. Бұл туралы өңірлік әкімдік LS редакциясының сауалына берген жауабында мәлім етті.
Мәліметке сәйкес, облыста 65 млрд теңгеге жылуоқшаулағыш материалдар шығаратын зауыт салынып жатыр. Кәсіпорын жылына 1,3 млн шаршы метр өнім өндіруге қауқарлы.
Қазіргі таңда жоба бойынша техникалық-экономикалық негіздеме мемлекеттік сараптамадан өткен. Қазір сметалық құжаттама тексерілуде.
Кәсіпорынды биыл іске қосу жоспарланған. Сонымен қатар инфрақұрылымға қосу жұмыстары жүргізіліп жатыр.
"Негізгі және қосалқы технологиялық жабдықтарды қабылдау және орнату жұмыстары жүргізілуде", – делінген жауапта.
Қазіргі уақытта кадрларды іріктеу процесі де басталған. Кәсіпорында 186 жұмыс орнын ашу көзделіп отыр.
Бұған дейін, LS редакциясы Атырау облысында да ресейлік компанияның қатысуымен жоба жүзеге асырылатынын жазған болатын. Онда экструзиялық полипропилен георешеткаларын шығаратын зауыт ашу жоспарланған. Жобаға 2 млрд теңге инвестиция салу көзделіп отыр.
