Алматы маңында G4 City спутник қаласын салу бойынша жобаны іске асырудың егжей-тегжейлері айтылды, деп хабарлайды LS.
Алматы облысы әкімдігінің баспасөз қызметі хабарлағандай, аймақ басшысы Амандық Баталовқа G4 City тұжырымдамасы ұсынылды. Surbana Jurong (Сингапур) компаниясы жоба менеджерінің орынбасары Джоши Шриннің айтуынша, жобаны іске асыру бойынша сегіз қадам белгіленген.
Сингапур тарапының деректері бойынша, бұл қала дамыған инфрақұрылымы бар қаржы-іскерлік, білім беру және ғылыми медициналық орталықты, өнеркәсіптік, сауда-логистикалық хабты біріктіретін болады. Сондай-ақ, олар тартымды туристік аймақ пен қолайлы тұрғын үй аймағын құруды жоспарлап отыр.
Олар сонымен қатар, визалық режимді жүйелеп, арнайы экономикалық аймақ мәртебесін беруді, инвестициялық резиденция, валюталық бақылау құруды және халықаралық әуежай салуды ұсынды.
Өз кезегінде өңір басшысы стратегиялық ұсыныстарды әзірлеуге қолдау білдірді.
"Тұжырымдама – егжей-тегжейлі жоспарлау жобасы емес. Дегенмен, бұл жобаны үкіметке таныстыруға мүмкіндік беретін құжат", - деді Баталов.
Бүгінде Gate City орналасатын аумақта ауданы 13 мың шаршы метр үш тоғыз қабатты үйдің құрылысы басталып кетті.
Ақпаратқа сәйкес, үш үйдің құрылысы жүріп жатыр. Мұнда балалар ойын алаңдары, воркаут-алаңдар және тағы басқалар орналастырылады. Жыл соңына қарай тұрғын үйлерді барлық қажетті инфрақұрылымға қосуға мүмкіндік болады.
Сонымен қатар, Баталов осы аумақта балабақша, мектеп, шағын дәрігерлік амбулатория сияқты әлеуметтік маңызы бар нысандардың құрылыс жобаларын әзірлеуді тапсырды.
Анықтама
Surbana Jurong Private Limited – инфрақұрылым мен қалаларды дамытуға маманданған сингапурлық мемлекеттік консалтингтік компания.
