Алматы қаласында үшінші вокзал салу жоспарлануда. Қала әкімдігінде LS-ке егжей-тегжейі айтылды.
Әкімдіктің мәліметінше, Алматы-3 вокзалының құрылысы агломерацияны дамыту жөніндегі жобалар кешеніне кіреді.
"Бұл жоба жүк және жолаушылар ағынының бір бөлігін қайта бағдарлауға, сондай-ақ, айналымға қосымша жолаушылар пойыздарын енгізуге мүмкіндік береді. Бұдан басқа, қолданыстағы пойыздардың бірқатар бағыттарын Алматы-1-ден Алматы-2-ге ауыстыруға болады. Осының есебінен қалалық автожол инфрақұрылымына көліктік жүктеме азаяды", - деп түсіндірді әкімдікте.
Сондай-ақ, әкімдікте техникалық-экономикалық негіздемені әзірлеу 2024-2025 жылдарға жоспарланғанын нақтылады. Келесі кезеңде жобалау-сметалық құжаттама жасалмақ. Сонымен қатар, қаржыландыру көлемі, техникалық сипаттамалары және вокзал қызмет көрсететін бағыттар есептеледі.
Естеріңізге сала кетейік, 2021 жылы "Алматыгипрогор-1" тарапынан мегаполисте үшінші теміржол вокзалын салу туралы ұсыныс айтылды. Сол кезде "Қазақстан темір жолы" LS редакциясына оның құрылысымен айналысуды жоспарламағанын хабарлаған болатын.
2022 жылы мегаполис әкімдігінде мәслихаттың XXV сессиясы барысында жүк жолаушылар ағынын түсіру үшін "Алматы-3" салу ниеті туралы хабарланды.
