Алматы облысында шыны аспалы көпір салу жобасын іске асыру жоспарланып отыр. Жобаның жай-жапсарын LS-ке өңірлік әкімдікте айтып берді.
Нысан Кеген ауданындағы туристік аймақ – "Қара шатқалда" (Қара каньон) орналасады. Жобаның құны 1,5 млрд теңгеге бағаланған. Құрылыс жұмыстарын ASK Capital компаниясы жүзеге асырады. Құрылыстың мерзімі 2025-2026 жылдарға жоспарланған.
"2024 жылы аудандық бюджеттен 57 млн теңге бөлініп, электр желілерін жүргізу жұмыстары жүзеге асырылды. Қазіргі уақытта желілер толықтай пайдалануға берілді", – деп хабарлады әкімдікте.
Сонымен қатар автотұрақ пен павильон құрылысына арналған алаңды дайындау және тегістеу бойынша жер жұмыстары аяқталды. Қазіргі таңда жобалық-сметалық құжаттама мемлекеттік сараптамадан өту кезеңінде. Оң қорытынды алынғаннан кейін компания құрылыс-монтаж жұмыстарына кірісуді жоспарлап отыр.
Бұған дейін LS жобаны жүзеге асыру үшін бірқатар түйткілді мәселелер бар екенін жазған. Оның ішінде электрмен қамту және аумақты бас жоспарға енгізу мәселелері көтерілген.
Сонымен қатар облыста "Көшпенділер қаласы" жобасы іске асырылып жатыр. Жоба аясында жылына 150 мыңға дейін турист қабылдай алатын бірегей этнотуристік кешен салу көзделген.
"Жоба инвестордың өз қаражаты есебінен 100 пайыз қаржыландырылады", – делінген хабарламада.
Құрылыс кезеңінде 120-ға дейін жұмыс орны ашылады деп жоспарланса, нысан пайдалануға берілген соң 80 тұрақты жұмыс орны құрылады.
