Қазақстан "Қашаған" жобасындағы 2,3 трлн теңгелік дауды жалғастырып жатыр. LS тілшісі Экология және табиғи ресурстар министрлігінен егжей-тегжейлі ақпарат алды.
Министрліктің мәліметінше, компанияға 2,3 трлн теңге көлемінде айыппұл салынған. Бұл нормадан тыс күкірт орналастырғаны үшін жасалған шара.
Қазіргі уақытта әкімшілік айыппұлға қатысты шешім экологиялық реттеу және бақылау комитетінде қаралуда.
"Норт Каспиан Оперейтинг Компани Н.В." (НКОК) компаниясы 2025 жылдың 19 қарашасында тергеуді тоқтату туралы өтініш берді. Бұл өтініштер Астананың мамандандырылған ауданаралық әкімшілік сотына жіберілген талап-арызға байланысты. Оператор 2025 жылы 10 қазанда жүргізілген алдын ала тексеру кезінде анықталған бұзушылықтарды түзету нұсқауларын орындамаған.
Өтініштер қанағаттандырылып, шағымдарды қарау мерзімі талап-арыз бойынша сот шешімі заңды күшіне енгенге дейін тоқтатылды.
2025 жылғы 23 желтоқсанда Астананың мамандандырылған ауданаралық әкімшілік соты әкімшілік талап-арызды қанағаттандырудан бас тартып, нұсқауды заңды деп таныды. Қазір сот шешімі әлі заңды күшіне енген жоқ.
Бұған дейін, LS редакциясы хабарлағандай, Атырау облысының экология департаменті процессуалдық бұзушылықтарды жойып, дауды қайта жалғастырған.
