Мемлекеттік кірістер комитеті (МКК) LS-ке Ұлттық қорға неге аз қаражат түсіп жатқанын түсіндірді.
МКК деректеріне сүйенсек, 2025 жылдың бірінші тоқсанында Ұлттық қорға 621,9 млрд теңге салық түсімі түскен. Бұл өткен жылдың сәйкес кезеңімен салыстырғанда (шамамен 1,2 трлн теңге) 546,5 млрд теңгеге кем.
"Түсімдердің төмендеуінің негізгі себебі – шикі мұнайдың әлемдік бағасының бір баррельге шаққанда $8,3-ке төмендеуі (2025 жылдың І тоқсаны – $74,9, 2024 жылдың І тоқсаны – $83,2)", – делінген ресми жауапта.
Ұлттық қордың кірістері негізінен мұнай-газ саласындағы компаниялар төлейтін салықтар есебінен қалыптасады. Бұл компаниялардың тізімін жыл сайын энергетика және қаржы министрліктері бекітеді. Комитет мамандарының айтуынша, түсім көлеміне сыртқы факторлар – мұнайдың әлемдік бағасы мен тасымалдау шарттары, сондай-ақ, ішкі факторлар – өндіріс көлемі, ел ішіндегі шикізат тапшылығы, кен орындарының рентабельділігі мен геологиялық ерекшеліктеріне байланысты берілетін салықтық жеңілдіктер әсер етеді.
Бұған дейін, LS редакциясы Ұлттық қордағы қаражат 33 трлн теңгеден асқанын жазған болатын. Қордан бөлінген трансферттердің жалпы көлемі 2,01 трлн теңгені құрады. Оның ішінде кепілдендірілген трансферттер – 1,6 трлн теңге, нысаналы трансферттер – 400 млрд теңге.
