Freedom Finance Bank "7-20-25" тұрғын үй бағдарламасының қатысушысы болды, деп хабарлайды LS.
Тиісті келісімге қаржы институты мен қазақстандық тұрақтылық қоры (ҚТҚ) қол қойды.
"Freedom Finance Bank өзінің цифрлық ипотекасы негізінде "7-20-25" жобасын жүзеге асыруда. Осылайша, қарыз алушылар құрылыс салушыдан қаржы институтына бірден өтінім беруге және ипотеканы онлайн-режимде ресімдеудің барлық кезеңдерінен өтуге мүмкіндік алды", - деп хабарлады ҚТҚ.
Айта кетейік, бағдарлама шарттары бойынша несие 7% жылдық мөлшерлемемен 25 жылға дейін беріледі. Бастапқы жарна сатып алынатын тұрғын үй құнының 20%.
Несиелеу объектісі – бастапқы жылжымайтын мүлік. Тұрғын үйдің ең жоғарғы құны – Нұр-Сұлтан, Алматы, Ақтау, Атырау, Шымкент қалалары үшін 25 млн теңге, Қарағанды үшін 20 млн теңге, қалған өңірлер үшін 15 млн теңге.
Қаржыландыру көлемі 1 трлн теңгені құрайды. 2022 жылғы 24 ақпандағы жағдай бойынша 471 млрд теңгеге 38 мыңнан астам несие берілді.
Осылайша, "7-20-25"-ке тоғыз банк қатысады: ЦКБ, Сбер, Халық, Еуразиялық, RBK, Jusan Bank, ForteBank, Altyn Bank және Freedom Finance Bank.
Бұған дейін, LS Қазақстанда ипотека 10 жыл ішінде 2,5 трлн теңгеден астам өскендігі туралы инфографика дайындаған болатын.
