Қазақстанда осы жылдың басынан бастап шағын және орта бизнес (ШОБ) тексерулеріне мораторий жойылды. LS тілшісі елде кім қандай айыппұл арқалағанын білді.
Редакцияның сұрауына жауап ретінде мемлекеттік кірістер комитетінде есепті кезеңде 4 387 кешенді және тақырыптық салықтық тексеру жүргізілгені айтылды. Оның 3 496-сы ШОБ субъектілеріне тиесілі, онда қосымша салықтар мен өсімпұлдар сомасы 15,08 млрд теңгені, айыппұлдар сомасы – 40 млн теңгені құрады.
"3 077 тексеру немесе 88% салық төлеушілердің өздері бастамашылық етті (тарату тексерулері және қосылған құн салығын (ҚҚС) қайтару бойынша тексерулер)", – деп қосты комитетте.
Тексеру барысында негізгі салықтар (корпоративтік табыс салығы және қосылған құн салығы) бойынша әдіснамалық сипаттағы мәселелерге, сенімсіз салық төлеушілермен өзара есеп айырысуларға, еңбекақы төлеу қорына салықты есептеуге байланысты бұзушылықтар анықталды.
Сонымен қатар, ШОБ арасында көбінесе көтерме және бөлшек саудада жұмыс істейтіндерді тексерді (1 862 тексеру). Олар бойынша 5 млрд теңгеге салықтар мен өсімпұлдар қосымша есептелді.
Құрылыс – 234 тексеру, 1,4 млрд теңге қосымша есептелген.
Өңдеу өнеркәсібі – 209 тексеру, 422 млн теңге қосымша есептелген.
Көлік және қоймалау, басқа да қызметтерді ұсыну – 155 тексеру, 6,4 млрд теңге қосымша есептелген.
Сондай-ақ, LS-ке МКК-де мониторинг жиі жүргізілетін өңірлер тізімделді:
- Алматы – 947 тексеру, салықтар мен өсімпұлдар 10,2 млрд теңге;
- Астана – 633 тексеру, салықтар мен өсімпұлдар қосымша есептелді 405 млн теңге;
- Қостанай облысы – 281 тексеру, 239 млн теңге қосымша есептелді;
- Қарағанды облысы – 231 тексеру, қосымша есептелген 416 млн теңге.
