Қазақстандықтарға зейнетақы жинақтарының бір бөлігін жеке басқаруға беруге рұқсат етіледі, бірақ оларға мемлекеттік кепілдіктер қолданылмайды, деп хабарлайды LS.
Еңбек және халықты әлеуметтік қорғау министрі Тамара Дүйсенова әлеуметтік Кодексте қазақстандықтарды зейнетақымен қамсыздандыру бөлігінде жоспарланған өзгерістер туралы айтты.
"Салымшылардың өз активтерін басқару жөніндегі құқықтарын кеңейту бойынша өзгерістер енгізілуде. Салымшылар жинақтардың 50%-дан аспайтын бөлігін жеке басқаруға бере алады. Алайда зейнетақы жинақтарының сақталуына мемлекеттік кепілдік олардың Ұлттық банк басқаратын бөлігіне ғана қолданылады", - деп түсіндірді министр.
Сонымен қатар, Дүйсенованың айтуынша, аға және бүгінгі ұрпақ зейнеткерлері үшін алдағы бес жылда базалық зейнетақы ұлғаяды. Сондай-ақ, еңбек зейнетақысының мөлшерін есептеу үшін пайдаланылатын ең жоғары табыс мөлшері 46 (140,8 мың теңге) АЕК-тен 55 (168,4 мың теңге) АЕК-ке дейін немесе орташа жалақының 70%-на дейін ұлғаяды.
Бұл ретте өз жинақтары есебінен зейнетақы қалыптастыратын болашақ зейнеткерлер үшін 2024 жылғы 1 қаңтардан бастап жұмыс берушілердің қосымша зейнетақы жарналары енгізілетін болады.
Өз кезегінде премьер-министр Әлихан Смайылов үкіметтің алдында әлеуметтік кодексті әзірлеу және қабылдау міндеті тұрғанын атап өтті.
"Бұл аса маңызды құжат қазақстандықтардың туғаннан бастап қартайғанға дейінгі базалық әлеуметтік құқықтарын белгілейді. Бірінші кезекте ол халықтың өмір сүру сапасын арттыруға бағытталған. Осы міндеттерді шешу қолданыстағы нормативтік базаны қайта қарауды талап етеді. Кодекстің қабылдануымен жаңа әлеуметтік саясат өтініш формасынан проактивті форматқа ауысады. Бұл міндет, мысалы, отбасының цифрлық картасын енгізу арқылы жүзеге асырылады. Пилоттық нұсқада ол қыркүйек айынан бастап аз ғана қызметтер бойынша жұмыс істейді және өз нәтижесін көрсетті", - деді ол.
Үкімет басшысының айтуынша, жекелеген әлеуметтік шаралар 2023 жылдан бастап іске асырылатын болады, дегенмен кодекс әлі де парламентте болады.
"Мен айтылған бағыттарды мақұлдауды және әлеуметтік Кодекс жобасына дауыс беруді ұсынамын. Дауыс беремiз. Қабылданды. Еңбек министрлігі премьер-министрдің кеңсесімен бірлесіп, жобаны мәжіліске уақтылы енгізуді қамтамасыз етсін", - деп түйіндеді Смайылов.
Бұған дейін, мәжілісмен Аманжан Жамалов қазақстандықтарға коммуналдық қызметтер бойынша несиелер мен қарыздарды өтеуге зейнетақы ақшасын жұмсауға рұқсат беруді ұсынған болатын. Сондай-ақ, Жамалов президенттің зейнетақы жинақтарының 50%-на дейін жеке басқаруға беруге рұқсат беру туралы тапсырмасын бағалады.
Естеріңізге сала кетейік үкіметтің кеңейтілген отырысында Қасым-Жомарт Тоқаев БЖЗҚ салымшыларының зейнетақы жинақтарының 50%-на дейін жеке басқаруға беру құқығын кеңейту қажеттігін мәлімдеді. Бұған дейін, депутаттар БЖЗҚ жұмысын сынға алған болатын. Олардың пікірінше, елімізде азаматтарымыздың зейнетақы жинақтарының деңгейіне қатысты проблемалар бар.
