Қазақстанда мұнай базаларындағы дизель отынының қоры 220,8 мың тоннаны құрайды, бұл 13 күнге ғана жетеді. Мұндай ақпаратты энергетика министрлігінде жеткізді деп хабарлайды LS.
Энергетика министрі Болат Ақшолақовтың айтуынша, биыл күзгі дала жұмыстарына 423,5 мың тонна дизель отыны бөлінген. Шілдеде 106,6 мың тонна тиелсе, тамызда 148,2 мың тоннаға төленді.
"Ауыл шаруашылығы тауарын өндірушілерге мұнай өңдеу зауыттарынан (МӨЗ) дизель отынын жеткізу қарқынды түрде жүзеге асырылады. Министрлік жөнелту бойынша тұрақты мониторинг жүргізуде. Аграршылар үшін баға тоннасына 222 мың теңге немесе литріне 184 теңге деңгейінде анықталды. Жеткізу мен сақтауды ескере отырып, бөлшек сауда құны аймаққа байланысты 15-25%-ға төмен", - деп түсіндірді ол.
Министрдің сөзінше, 22 тамыздағы жағдай бойынша мұнай базаларында және жолда АИ-92 бензинінің жиынтық қоры 180 мың тоннаны құрайды, бұл қажеттілікті 14 күнге жабады.
"Дизель отынының қоры 220,8 мың тоннаны құрайды, бұл 13 күнге жетеді. Ал ҚР МӨЗ қорлары: АИ-92 – 71 мың тонна, дизель отыны – 53,4 мың тонна. АИ-92 бойынша жағдай тұрақты, жанармай құю станцияларының негізгі желілерінде шектеулер жоқ. Сонымен қатар, дизель отыны бойынша отынды сатуда шектеулер, яғни талондар мен карталар арқылы отын беруге көшу, лимиттер белгілеу байқалады", - деді ол.
Қазіргі уақытта мұнай өңдеу зауыттары отынды жеткілікті мөлшерде өндіреді, деп атап өтті министр.
"МӨЗ-дағы қорлар шамамен 50 мың тоннаны құрайды, алайда мұнай өнімдерін жөнелту тұрақсыз, бос вагон-цистерналар жеткіліксіз мөлшерде жеткізіледі, вагондарды жеткізу пункттеріне дейін жеткізу мерзімінің ұлғаюы байқалады. Осыған байланысты логистикалық тізбектің барлық буындарының үйлесімді жұмысы қажет", - деп түйіндеді Ақшолақов.
Бұған дейін хабарланғанымыздай, Қазақстанда жанар-жағармайға шекті баға белгіленген. Сондай-ақ, Қазақстан шетелге бензинді аз мөлшерде, ал дизель отынын көбірек сата бастағаны белгілі.
