2022 жылы 450 мыңнан астам жұмыс орнын құру жоспарлануда. Бұл туралы LS-ке еңбек және халықты әлеуметтік қорғау министрлігінде хабарлады.
Министрлiктiң мәліметінше, 2021-2025 жылдары елімізде 10 ұлттық жоба аясында 2,5 млн жаңа жұмыс орнын ашу жоспарланған. Оның ішінде 800 мың тұрақты және 1,7 млн уақытша.
2022 жылы 450 мыңнан астам бос жұмыс орны пайда болады деп күтілуде. Оның ішінде "Дені сау ұлт" жобасы бойынша – 45,5 мың, Bilimdi Ult – 103,9 мың, "Кәсіпкерлікті дамыту" жобасы бойынша – 995,3 мың, "Қуатты өңірлер" – 491,1 мың, "Орнықты экономикалық өсу" жобасы бойынша – 127,7 мың, "Цифрландыру, ғылым және инновациялар есебінен технологиялық серпіліс" жобасы бойынша – 100 мың, "АӨК дамыту" жобасы бойынша – 500 мың, "Жасыл Қазақстан" жобасы бойынша – 61 мың, "Ұлттық рухани жаңғыру" жобасы бойынша – 7 мың.
Сонымен қатар, еңбек министрлігінің орта мерзімді болжамына сәйкес, алдағы бес жылда жалдамалы еңбекке жиынтық сұраныс 1 млн адамды құрайды. 2022 жылы – 189,7 мың адам. Оның ішінде жаңа сұраныс – 51,4% немесе 97,6 мың адам, ауыстыру бойынша сұраныс – 48,6% немесе 92,1 мың адам.
"Сұраныс тапшылығы негізінен электрмен және энергиямен жабдықтау, сондай-ақ, мемлекеттік басқару және әлеуметтік қамсыздандыру салаларында күтіледі", - деп түсіндірді ведомствода.
Министрлік "Еңбек" бағдарламасын іске асырудың тоқтатылуына байланысты оның тетіктері кәсіпкерлікті дамыту жөніндегі ұлттық жоба шеңберінде жалғастырылғанын атап өтті. Бұдан басқа, "Электрондық еңбек биржасы" жұмыс істейді, ол жұмыс іздеу және персоналды іріктеу мүмкіндігімен жұмысқа орналастыру бойынша бірыңғай цифрлық алаң болып табылады. Сондай-ақ, жұмыспен қамтуға жәрдемдесудің белсенді шараларын цифрландыру жөніндегі пилоттық жоба шеңберінде жұмыс жалғасуда, онда азаматтар онлайн-режимде мемлекеттік қызметтерді, сондай-ақ, жастар практикасына, әлеуметтік жұмыс орындарына және қоғамдық жұмыстарға жолдамалар беруді қамтитын мемлекеттік қолдау шараларын ала алады.
Естеріңізге сала кетейік, Ұлттық статистика бюросының деректеріне сілтеме жасаған мәжіліс депутаттарының деректері бойынша 2021 жылы Қазақстандағы жұмыссыздар саны 4,9%-ды, яғни шамамен 451 мың адамды құрады. Олардың ішінде 78 мыңға жуығы жұмыссыз жастар. Алайда, депутаттар елдегі жұмыссыздардың нақты пайызы әлдеқайда жоғары деп санайды.
