Қарағанды облысында ресейлік инвестициялар есебінен шиналар шығаратын зауыттың құрылысы басталды, деп хабарлайды LS премьер-министрдің баспасөз қызметіне сілтеме жасап.
Жобаны Саран қаласында "Аллюр" және "Татнефть" компаниялар тобы KamaTyresKZ бірлескен кәсіпорны іске асырады. Оны жүзеге асыру 125 млрд теңгеге бағаланып отыр. Ақпаратқа сәйкес, зауыттың өндірістік қуаты бірінші кезеңде жыл сайын 3,5 млн көпбейінді шинаны құраса, кейіннен жылына 9 млн шинаға дейін жеткізілмек.
"Зауыт Қазақстанның автомобиль өндірісін оқшаулау деңгейін арттыруға және шиналардың импортын алмастыруды қамтамасыз етуге мүмкіндік береді. Бұл ретте өнімнің 40%-ын экспорттау жоспарлануда", - делінген хабарламада.
Жобаны жүзеге асыру 2022 жылдың соңына жоспарланған. Кәсіпорында 1,1 мыңнан астам жаңа жұмыс орны ашылады деп күтілуде.
"Шина зауытын салу жобасы Қазақстан мен Ресей арасындағы өнеркәсіптік кооперацияның нақты іс жүзінде кеңейгенін айғақтайды", - делінген хабарламада.
Сонымен қатар, битумды түрлендіруде, адгезивтерді, желімдерді, резеңкелерді және экологиялық таза шиналарды дайындауда қолданылатын бутадиен каучуктерін өндіру жобасы бойынша ынтымақтастықтың базалық шарттары туралы келісімге қол қойылды. Жобаны іске асыру мерзімі – 2021-2025 жылдар, өндіріс қуаты-жылына 186 мың тонна бутадиен каучуктері мен 170 мың тонна изобутанды құрайды.
Бұдан басқа, индустрия және инфрақұрылымдық даму министрлігі мен ресейлік компания арасында Қазақстанда битум зауытын салу туралы келісімге қол қойылды.
Бұған дейін, LS келесі жылдың көктемінде Қарағанды облысында 111 млрд теңгеге автошина шығаратын зауыт салынатыны туралы жазған болатын. Сондай-ақ, өткен жылы өңір басшысы Жеңіс Қасымбек инфрақұрылымды жүргізу басталғанын хабарлады.
