Астана мен Алматы әуежайларында биометрия енгізіледі. Бұл туралы LS-ке Азаматтық авиация комитетінде хабарлады.
Ведомствоның LS сұрауына берген жауабына сәйкес, пилоттық жоба аясында Астана мен Алматы әуежайларында жолаушы биометриялық деректерін ұсынған кезде және eGov Mobile мобильді қосымшасы арқылы отырғызу талонын жүктегенде бірегей токен қалыптастырылады.
"Бұл жүйе жолаушылардың биометрия арқылы жылдам сәйкестендірілуіне мүмкіндік беріп, әуежайдағы тіркеу, тексеру және ұшаққа отырғызу кезіндегі адами факторға байланысты тәуекелдерді барынша азайтады", - деп түсіндірді комитет өкілдері.
Комитеттің хабарлауынша, қазіргі уақытта азаматтық авиация саласы қарқынды түрде цифрландырылуда. Атап айтқанда, жолаушыларды рейстердің кешігуінен ерікті сақтандыру жүйесі енгізілуде. Бұл ұшу мәртебесінің өзгеруі жағдайында жолаушыларға өтемақы алуға мүмкіндік береді.
Бұған дейін, LS редакциясы Қазақстан әуежайларында ауқымды тексерістер жүргізілетінін хабарлаған болатын.
