Алматыда экологияға зиянды автокөліктердің қозғалысын шектеу мүмкіндігі қарастырылып жатыр. Бұл туралы LS-ке экология және қоршаған орта басқармасы басшысының орынбасары Мадияр Қожекенов мәлімдеді.
Power Tech 2025 шарасының кулуарында ол әкімдіктің қоршаған ортаны жақсартуға бағытталған заңнамалық түзетулер ұсынғанын мәлімдеді. Бұл түзетулер мәслихатқа атмосфералық ауаны қорғау ережелерін бекіту құқығын береді.
"Қазір осы нормаларды әзірлеу жұмыстары жүріп жатыр. Олардың аясында барлық мәселелер, соның ішінде экологияға зиянды автокөліктердің қозғалысын шектеу мәселесі де қарастырылады", – деп түсіндірді М. Қожекенов.
Бұдан бөлек, үшінші санаттағы* шығарындылар көздерін реттеу және басқа да шараларды енгізу ұсынылып отыр.
LS тілшісімен әңгімесінде Қожекенов бұл ережелердің биыл қабылданатынын және содан кейін ғана нақты бастамаларды талқылауға мүмкіндік туатынын айтты.
Бұған дейін, қала әкімі Ерболат Досаев Алматыда экологияға зиянды автокөліктер үшін ақылы жүріс аймақтарын енгізу жоспары бар екенін мәлімдеген еді.
*III санат- қоршаған ортаға айтарлықтай кері әсерін тигізбейтін нысандар.
