Еңбек және халықты әлеуметтік қорғау министрлігі LS-ке 2025 жылы зейнетақы төлемдерінің қалай өзгеретіні туралы айтты.
Министрліктің ақпараты бойынша, 2025-2027 жылдарға арналған республикалық бюджет шеңберінде оларды жүзеге асыруға келесі жылы 4,2 трлн теңгеден астам қаражат көзделген. Оның ішінде жасы және еңбек сіңірген жылдары бойынша – 2,86 трлн теңге, базалық зейнетақы бойынша – 1,36 трлн теңге.
Сондай-ақ, министрлікте базалық зейнетақы мөлшерін кезең-кезеңімен арттыру жалғасып жатқанын түсіндірді.
"Оның ең төменгі мөлшері 2023 жылдан 2027 жылға дейін тиісті қаржы жылына арналған республикалық бюджет туралы заңда белгіленген ең төменгі күнкөріс деңгейінен 54%-дан 70%-ға дейін, ал ең жоғары мөлшері – 100%-дан 120%-ға дейін арттырылатын болады", - деп нақтылады еңбек министрлігінде.
Осылайша, 2025 жылғы 1 қаңтардан бастап базалық төлемнің ең төменгі мөлшері 65%-дан 70%-ға дейін, ал ең жоғары мөлшері 105%-дан 110%-ға дейін ұлғаяды.
Жиынтық зейнетақы мөлшеріне келетін болсақ, жыл сайынғы өсім қорытындысы бойынша оның ең төменгі мөлшері 95 131 теңгені, ал ең үлкені – 213 046 теңгені құрайды.
Жалпы, 2,4 млн зейнеткердің зейнетақысы өседі.
Бұған дейін, LS редакциясы шетелге кеткен қазақстандықтар БЖЗҚ-дан 34 млрд теңгеге жуық ақша шешкенін жазған болатын. Негізінен төлемдер рубльмен және теңгемен алынған.
