Ресей Өскемен мен Семей қалаларында салынып жатқан жылу электр станцияларының (ЖЭО) жобаларын қаржыландыруға қатысу мүмкіндігін әлі де сақтап отыр. Бұл туралы "Самрук-Энерго" АҚ басқарма төрағасы Қайрат Мақсұтов LS-ке берген сұхбатында мәлімдеді.
Оның сөзінше, қазір дайындық жұмыстары жүріп жатыр және қаржыландырудың бірнеше нұсқасы, соның ішінде компанияның өз қаражаты мен мемлекетаралық келісім бойынша ұсынылған ресейлік қаржы, қарастырылуда.
"Қазір біз Ресеймен бірге қаржыландырудың соңғы шарттарын пысықтап жатырмыз, әзірге нақты шешім қабылданған жоқ. Қаржыландыру көзі анықталған соң, біз мердігерлерді таңдау жұмысына кірісеміз. Бұл процеске ресейлік тарап та, сондай-ақ жылу станцияларын салу тәжірибесі бар халықаралық компаниялар да қатыса алады", - деді ол.
Қайрат Мақсұтовтың айтуынша, ресейлік тараптың құрылысқа қатысу мүмкіндігі әлі де бар.
"Иә, Ресей әлі де қатыса алады. Бірақ әзірге түпкілікті шешім жоқ", - деп нақтылады ол.
Сонымен қатар, ол ЖЭО құрылысының 2029 жылдың соңына дейін аяқталуы жоспарланғанын айтты.
Бұған дейін, Қазақстан қыркүйек айында екі ЖЭО салу туралы шешім қабылдайтыны хабарланған еді. Вице-премьер Роман Склярдың сөзінше, ресейлік "Интер РАО" компаниясы жеңілдетілген экспорттық қаржыландыру ала алмағандықтан, Қазақстан нысандарды өз күшімен салуы ықтимал.
Салалық сарапшы Жақып Хайрушев LS редакциясына берген пікірінде Қазақстанның ресейлік серіктестерсіз үш ЖЭО жобасын өз күшімен іске асыра алатынын айтты.
