Halyk Finance Қазақстан теңгесінің АҚШ долларына қатысты бағамының 600 теңгеге дейін әлсіреу ықтималдығын талдады, деп хабарлайды LS.
Кеше биржада теңге айтарлықтай әлсіреді: KASE-де доллар бірден 4,32 теңгеге қымбаттап, 548,77 теңгеге жетті.
Halyk Finance басқарма төрағасының кеңесшісі Мұрат Темірхановтың айтуынша, Қазақстандағы валюта нарығы шағын және қатысушылар саны аз әрі әртүрлі емес.
"Сондықтан валютаны сұраныстың аз ғана өсуі де теңгенің күрт әлсіреуіне әсер етеді, дәл қазір де сол болып жатыр. Күзде әдетте импорт артады, валютаға сұраныс көбейеді, әсіресе үкімет инфрақұрылымдық жобаларға, мектептерге және басқа салаларға көп қаржы бөлген кезде", - дейді М. Темірханов.
Аналитик ұлттық валютаға әсер ететін негізгі факторларда айтарлықтай өзгеріс жоқ екенін атап өтті.
"Біздің жыл соңына арналған теңге бағамы бойынша болжамымыз өзгерген жоқ – $1 үшін 550- 560 теңге болады", - деді ол.
Halyk Finance өкілі шілдеде Ұлттық банк теңгенің шамадан тыс әлсіреуіне жол бермеу үшін $125,6 млн көлемінде интервенция жүргізгенін еске салды. Сол кезде теңге бір ай ішінде 520-дан 550 теңгеге дейін күрт әлсіреді, бұл фундаменталды факторларға сәйкес келмеді. Halyk Finance аналитикалық орталығы сол кезде интервенцияны ертерек жасау керегін айтқан.
"Фундаменталды факторларға сәйкес келмейтін осындай әлсіреу нарықтағы ұлттық валютаға сенімді төмендетті. Ұлттық банк енді теңгенің осындай күрт әлсіреуіне жол бермесін деп үміттенемін", - деді М. Темірханов.
Аналитикалық қаржы компаниясының мәліметінше, теңгенің әлсіреуі мұнай бағасының төмендеуімен және қазақстандық компаниялардың импорттық төлемдер мен сыртқы борышты өтеу үшін валютаға сұранысының дәстүрлі өсуімен байланысты. Әсіресе бұл айдың соңында байқалады.
Сонымен қатар, теңгенің шамадан тыс әлсіреуі импорттық тауарлардың қымбаттауына және инфляцияның өсуіне әсер етуі мүмкін.
Brent маркалы мұнай бағасы баррельге $70 төмен деңгейде саудаланып жатыр. LS сарапшысы Олжас Байдильдинов мұның ел экономикасына және ұлттық валютаға қалай әсер етуі мүмкін екенін бағалады.
Ал ВСС Invest жыл соңына дейін теңге бағамы $1 үшін 541–547 теңге деңгейінде сақталады деп болжам жасаған болатын.
