Ұлттық банк цифрлық теңгені қолдану аясы қалай кеңейтілетінін түсіндірді, деп хабарлайды LS.
Бас банктің мәліметінше, бұл қазіргі іске асырылып жатқан жобалар (несиелеу және субсидиялау) бағытында, сондай-ақ, жаңа жобаларда- белгілі бір тауар түрлерін сатып алуда және көлік құралын сатып алу кезінде жүзеге асырылады.
"Көлік құралдарына қатысты мәмілелерде фермерлерге арналған несие мен субсидиялау механизмдеріне ұқсас тәсіл енгізілуі мүмкін. Бұл жағдайда цифрлық теңгемен берілетін қаражат сатушыға тек автокөлік қайта тіркелгеннен кейін ғана қолжетімді болатындай етіп бағдарламалануы мүмкін",- деп түсіндірді Ұлттық банк өкілдері.
Қазіргі уақытта жобалар мен тауар түрлерін таңдауды қоса алғанда, бұл мәселелер салалық уәкілетті мемлекеттік органдармен пысықталып жатыр.
Бұған дейін, LS редакциясы цифрлық теңге желтоқсан айында толыққанды іске қосылатынын жазған болатын.
Еске сала кетейік, премьер-министр Олжас Бектеновтің Ұлттық банк өкілдерімен өткізген кеңесінде цифрлық ұлттық валютаны жылжымайтын мүлік пен көлік саудасында, жоғары құны бар тауарларды сатып алуда, сондай-ақ, агроөнеркәсіптік кешендегі мемлекеттік несиелеу тетіктерінде қолдану жоспарланып отырғаны айтылды.
