Енді қазақстандықтар Еңбек жинақтаушы зейнетақы қорындағы (ЕЖЗҚ) қаражатын кәмелетке толмаған балаларын емдетуге жұмсай алады, деп хабарлайды LS.
Тиісті өзгерістерге денсаулық сақтау министрі Ақмарал Әлназарова қол қойды.
Құжатта салымшылардың зейнетақы жинақтарын медициналық қызметтер көрсету үшін кәмелетке толмаған балаларын емдеуге пайдалануға болатыны нақтыланған.
Сондай-ақ, министрлік енгізген өзгерістерге сәйкес, өтініш беруші немесе оның заңды өкілі емделуге қолжетімді міндетті зейнетақы жарналары есебінен жинақталған соманы ЕЖЗҚ-нан өз бетімен сұратып алуы қажет.
Біржолғы зейнетақы төлемін емделуге пайдалану үшін ЭЦҚ (электрондық цифрлық қолтаңба) арқылы уәкілетті оператордың интернет-ресурсында авторизациядан өтіп, жеке кабинет ашып, онда электрондық өтініш толтырылады. Өтініште сомасы мен қаражатты пайдалану мақсаты көрсетіледі және ол ЭЦҚ арқылы расталады.
Егер азамат зейнетақы жинағын жұбайының немесе жақын туыстарының атына пайдаланатын болса, онда тараптар жеке кабинетте қаражатты беру туралы келісім жасайды. Келісім ЭЦҚ арқылы расталады және некені немесе туыстық қатынасты растайтын құжаттар қоса тіркеледі.
Қаражат арнайы шотқа түскеннен кейін, алушы немесе оның заңды өкілі қалаған медициналық ұйымды (соның ішінде шетелдік ұйымдарды) таңдай алады. Кейін ол тіркелген медициналық мекемеге барып, 220-баптың 3-тармағына сәйкес талаптарды анықтау үшін дәрігерлік-консультациялық комиссияға (ДКК) өтініш береді. Сонымен қатар, жеке куәлік пен бейінді маманның қорытындысы ұсынылуы тиіс.
Құжатта стоматологиялық қызметтерге қатысты талаптар да нақты көрсетілген. Атап айтқанда, медициналық ұйым азаматқа ДКК қорытындысын ем басталғанға дейін және ем барысында электронды не қағаз нұсқада ұсынуға міндетті. Сондай-ақ, бұл қорытынды екі жұмыс күні ішінде медициналық ақпараттық жүйеге 026/у нысаны бойынша енгізілуі тиіс.
Алушы немесе оның заңды өкілі ДКК қорытындысын және стоматологиялық ем бойынша келісімшартты электронды түрде уәкілетті операторға жолдайды. Құжаттар қабылданғаннан кейін бес жұмыс күні ішінде оператор қаражатты медициналық ұйымның арнайы шотына аударады.
Денталдық имплантация кезінде ДКК қорытындысын алу үшін емдеу жоспары, панорамалық немесе 3D рентген суреті мен стоматологиялық клиниканың лицензиясы ұсынылуы керек.
Егер алдыңғы имплантациядан үш ай өтпесе, бұрынғы бақылау суреті қолданылады. Ал егер бұрын имплантация жасалмаған болса, диагностикалық сурет берілуі тиіс.
Аталған бұйрық 27 сәуірден бастап күшіне енеді.
Бұған дейін, қазақстандықтар зейнетақы жинақтарын тұрғын үй жағдайын жақсарту және емделу үшін пайдалана алатын.
