Қазақстанда жаңа ипотекалық бағдарлама пайда болуы мүмкін. LS тілшісі қазір қандай несиелер қолжетімді екенін білді.
7-20-25. Операторы – қазақстандық тұрақтылық қоры
Бастапқы жарна-пәтер құнының 20%, мерзімі 25 жылға дейін және мөлшерлемесі 7%. Тұрғын үйді тек бастапқы нарықта сатып алуға болады. Астана, Алматы және олардың қала маңындағы аймақтары, Ақтау, Атырау және Шымкент үшін тұрғын үйдің ең жоғары құны – 25 млн теңге, Қарағанды, Түркістан үшін – 20 млн теңге, басқа өңірлер үшін – 15 млн теңге.
2022 жылдың 22 қазанына осы бағдарлама бойынша бөлінген 1 трлн теңгеден 732,8 млрд теңге сомасына 56 144 несие берілді. Оператордың болжамы бойынша қаражатты толық игеру 2023 жылдың I тоқсанының соңында күтіледі.
Нұрлы жер (5-20-25). Операторы – Отбасы банкі
Бағдарлама бойынша бастапқы нарықтан үй алуға болады. Бастапқы жарна – 20%-дан, 25 жылға дейін және мөлшерлемесі 5%. Бағдарламаға әкімдікте кезекте тұрған азаматтар ғана қатыса алады. Отбасының әрбір мүшесіне соңғы алты айдағы табыс 3,7 ең төменгі күнкөріс деңгейінен (2022 жылы 133,2 мың теңге) жоғары болмауы тиіс.
Әкімдіктер несиелік тұрғын үйдің құрылысын және сатылуын 1 шаршы метрге белгіленген бағамен қаржыландырады:
- 240 мың теңгеге дейін – Алматы;
- 220 мың теңгеге дейін – Нұр-Сұлтанда және оның қала маңындағы аймағында;
- 200 мың теңгеге дейін – Шымкент пен Алматы маңы аймағында;
- Ақтөбе, Атырау, Ақтау, Түркістан, Қарағанды және Қостанай облыстарында – 180 мың теңгеге дейін;
- қалған өңірлерде – 160 мың теңгеге дейін.
Бакытты отбасы (2-10-20). Операторы – Отбасы банкі
Көп балалы отбасылар және мүгедек балалары бар отбасылар ретінде санатта тұрғандарға арналған бағдарлама. Тұрғын үйді бастапқы және қайталама нарықтарда сатып алуға болады. Бастапқы жарна – 10%-дан, мөлшерлеме – 20 жылға дейінгі мерзіммен жылдық 2%-дан. Тұрғын үйді сіз әкімдікте кезекте тұрған аймақта ғана сатып алуға болады.
Әскери баспана. Операторы- Отбасы банкі
Бұл ипотекалық бағдарлама құқық қорғау органдарының қызметкерлеріне, ішкі істер және арнаулы мемлекеттік органдардың қызметкерлеріне қолжетімді. Қарызды жылдық 3,5%-дан 8%-ға дейінгі мөлшерлеме бойынша алуға болады. Тұрғын үй сатып алу Қазақстанның кез келген қаласында қолжетімді.
Жас Отбасы. Операторы – Отбасы банкі
Жас отбасыларға арналған бағдарлама. Ол бастапқы және қайталама нарықтарға таралады. Сондай-ақ, несиені учаскені сатып алуға, үй салуға немесе бар тұрғын үйді жөндеуге пайдалануға болады. Мөлшерлеме – 6%, мерзімі – алты жылдан тоғыз жылға дейін, қарыз сомасы – 100 млн теңгеге дейін. Несие алу үшін ерлі-зайыптылардың біреуі немесе екеуі де алдымен Отбасы банкінде жаңа депозит ашып, оған кем дегенде бір жыл салым салу керек. Салым ашылған уақытқа некеде тұру мерзімі бес жылдан аспауы тиіс.
Өз үйім. Операторы – Отбасы банкі
Өтініш берген кезде кемінде 500 мың теңге жинаған Отбасы банкінің барлық салымшылары үшін қолжетімді ипотека. Бастапқы жарна – 50%-дан, несие мерзімі – 25 жылға дейін, мөлшерлеме – 3,5%-дан 5%-ға дейін, қарыз сомасы – 90 млн теңгеге дейін. Тұрғын үйді құрылыс кезеңінде үлеске қатысу арқылы сатып алуға немесе салынып жатқан нысанда пәтер таңдауға болады. Тұрғылықты мекенжай бойынша тіркелу талап етілмейді және сатып алынатын тұрғын үй санына шектеулер жоқ.
Қайталама нарықтағы тұрғын үй. Операторы – Отбасы банкі
Бағдарламаға қатысу үшін сізде кемінде үш жыл жинақтау мерзімі бар Отбасы банкінде депозит болуы керек. Ақшаны пәтер сатып алуға, жөндеуге немесе ипотеканы қайта қаржыландыруға пайдалануға болады. Қазірдің өзінде атынызда тұрғын үйдің болуы маңызды емес. Несие бойынша мөлшерлеме-жылдық 7,5%-дан 8,5%-ға дейін, бастапқы жарна – 50%, несие беру мерзімі – 25 жылға дейін.
Отбасы банкінде несиенің үш түрі бар: алдын-ала, аралық және тұрғын үй. Олар бойынша мөлшерлемелер 3,5%-дан 8,5%-ға дейін, ал несие сомасы – 100 млн теңгеге дейін.
Алатау жастары. Операторы – Отбасы банкі
Алматы облысының жастарына арналған жаңа жеңілдікті бағдарлама. Несиелеудің ең жоғары сомасы – 10 млн теңге. Несие мөлшерлемесі 5%, мерзімі 19 жылға дейін. Бағдарламаға кемінде бір жыл еңбек өтілі бар 35 жастан аспаған өңір тұрғындары қатыса алады. Сондай-ақ, қатысушы облыста кемінде бір жыл тұруы керек.
Айта кетейік, 2021 жылдың қыркүйегінде "Шаңырақ" (5-10-20) бағдарламасы бойынша тұрғын үй сатып алуға өтінімдер қабылдауды тоқтатты. Сонымен қатар, биылғы жылы өтінімдер 1986 жылдан бері есепке тұрған әкімдік кезекте тұрғандардан қабылданады. Ол үшін Отбасы банкінің клиенті болудың қажеті жоқ.
Бұған дейін, "Ашық НҚА" порталында алда іске қосылуы жоспарланып отырған ипотекаларды субсидиялау бағдарламасы қағидаларының жобасы жарияланған болатын. Көмек алудың негізгі шарты тұрғын үйді соттан тыс сату туралы келісімнің болуы болады. Яғни, егер қазақстандық несиені төлей алмаса, онда оның мүлкі сотсыз сатылады.
Оның ішінде міндетті шарттар ипотека бойынша несиелеу мерзімі 240 айға дейін, бастапқы жарна тұрғын үй құнының кемінде 20%-ы. Сондай-ақ, жылжымайтын мүлік түрі бастапқы немесе салынып жатқан болуы тиіс.
