Қазақстанда жеңіл автокөлік өндірісі айтарлықтай өсті. Ал трактор өндірісі керісінше төмендеді, деп хабарлайды LS.
2026 жылдың қаңтар-шілде айларында елде 102,9 мың автокөлік өндірілді. Бұл өткен жылдың сәйкес кезеңімен салыстырғанда 36,4%-ға жоғары.
Сонымен қатар автобустар, троллейбустар және өзге де ірі габаритті жолаушылар көлігін өндіру көлемі 18,4%-ға артып, 1,6 мың бірлікті құрады.
Бұдан бөлек, арнайы мақсаттағы 594 автокөлік өндірілді. Бұл 2025 жылдың қаңтар-шілде айларымен салыстырғанда 26,8%-ға көп. Олардың қатарында сүт, мұнай өнімдері және азық-түлік тасымалдайтын көліктер бар.
Ал ауыл шаруашылығы техникасын өндіруде кері көрсеткіш байқалды. Трактор өндірісі 21,1%-ға төмендеп, 3,7 мың бірлікті құрады. Астық жинайтын комбайндар өндірісі де 0,8%-ға азайып, 675 бірлікке түсті.
Сонымен қатар егін жинауға арналған техниканы өндіру көлемі 17,7%-ға артып, 693 бірлікті құрады.
Жүк көліктерін өндіру көлемі 2%-ға төмендеп, 4 мың бірлікті құрады. Ал тіркемелер, жартылай тіркемелер және контейнерлер өндірісі 1,1%-ға азайып, 2 мың бірлікті құрады.
Теміржол техникасы өндірісінде де төмендеу тіркелді. Жыл басынан бері елде 1,9 мың жүк вагоны шығарылып, бұл өткен жылдың сәйкес кезеңімен салыстырғанда 6,3%-ға аз болды.
Дизель локомотивтерін құрастыру көлемі 1,5 есеге қысқарып, 28 бірлікті құрады. Ал жолаушылар вагондарының өндірісі керісінше 21,4%-ға артып, 68 бірлікке жетті.
