Қазақстан Мысырмен әуе қатынасын тоқтатады, деп хабарлайды LS.
Денсаулық сақтау бірінші вице-министрі Марат Шорановтың айтуынша, шектеулер коронавирустың жаңа штаммы – омикронның пайда болуымен байланысты. Осылайша, оны республика аумағына әкелуге жол бермеу үшін ведомствоаралық комиссия 3 желтоқсаннан бастап бірқатар шектеу шараларын енгізу туралы шешім қабылдады.
"Мысырмен жолаушылар ағынын және Бельгияда Египеттен келген адамнан "омикрон" коронавирусы анықталуын ескере отырып, осы елмен әуе қатынасын тоқтата тұруы керек", - деді ол.
Вице-министрдің айтуынша, Ботсвана, Лесото, Зимбабве, Мозамбик, Мадагаскар, Эсватини, Танзания және Гонконгтан шетел азаматтарының Қазақстанға кіруін шектеу қажет.
"Коронавирустың жаңа штаммы анықталған елдерден келген адамдар үшін вакцинацияға қарамастан міндетті ПТР-тестілеу енгізілсін. Бүгінгі таңда бұл Израиль, Чехия, Нидерланды, Ұлыбритания, Италия, Германия, Австралия, Канада. Сонымен қатар, елдерден келген адамдар ПТР тестінің нәтижесіне қарамастан жеті күнге оқшаулануы керек", - деп жалғастырды Шоранов.
Осыған байланысты келгендердің барлығын емхана деңгейінде қашықтықтан бақылау қажет, деп толықтырды вице-министр.
"Денсаулық сақтау министрлігінің басқа елдерде "омикрон" коронавирусының жаңа штаммының пайда болуын ескере отырып, мемлекеттік шекарада бақылауды күшейту туралы ұсыныстары қолдау тапты. Ел ішіндегі эпидемиологиялық жағдайды бақылау да тұрақты болуы керек, үй-жайларда және көлікте бетперде кию тәжірибесін жалғастырып, әлеуметтік қашықтықты сақтау керек. Сондай-ақ, вакцинациямен және ревакцинациямен тиісті қамтуды қамтамасыз ету қажет", -деді өз кезегінде премьер-министр Асқар Мамин.
Ол сондай-ақ, денсаулық сақтау министрлігі мен ақпарат және қоғамдық даму министрлігіне, әкімдіктерге осы бағыттағы жұмысты күшейтуді тапсырды.
Бұған дейін, LS қазақстандықтар желтоқсан және жаңа жылдық мерекелерге қай елдерге демалуға ұшатыны туралы ақпарат дайындаған болатын. Сондай-ақ, Қазақстан Венгриямен тұрақты әуе рейстерін жаңартатыны белгілі.
