Қазақстандағы мұнайлы өңірлердің бірінде соңғы жеті жыл ішінде мұнай өндіру көлемі екі есеге қысқарды. Бұл туралы LS-ке энергетика министрлігінде хабарлады.
Энергетика министрлігінің мәліметінше, Қашаған, Қарашығанақ және Теңіз сияқты ірі кен орындарын қоспағанда, елдегі мұнай кеніштерінің көпшілігі игерудің соңғы кезеңдеріне жақындаған. Соның салдарынан мұнай өндіру қарқыны бірқатар өңірде, әсіресе Қызылорда мен Ақтөбе облыстарында төмендеп келеді.
"Биыл Қызылорда облысында мұнай өндіру көлемін 3 млн тонна деңгейінде сақтау жоспарланған. Бұл өткен жылғы көрсеткішпен бірдей. Дегенмен, өңірдегі өндіріс көлемі 2019 жылмен салыстырғанда екі есеге азайған",- деп мәлімдеді министрлікте.
Министрліктің мәліметінше, бүгінде игеріліп жатқан кен орындарының басым бөлігі өткен ғасырдың ортасында ашылған. Осыған байланысты олардың қоры сарқылып, мұнай өндіру көлемі біртіндеп төмендеп келеді.
Мұнай қорын толықтыру мақсатында геологиялық барлау жұмыстары жалғасуда. Жыл сайын жаңа жобалар өнеркәсіптік игеру кезеңіне өтіп, елдің қор базасын ұлғайтуға мүмкіндік беріп отыр.
Сонымен қатар, әлеуеті жоғары әрі аз зерттелген аумақтарда жаңа кен орындарын анықтау бағытында іздестіру жүргізілуде. Инвесторларды тарту үшін қолайлы жағдайлар жасалып, жер қойнауын тереңірек зерделеуге арналған сейсмикалық зерттеулер қолға алынуда.
Бұған дейін, LS редакциясы Қазақстанның мұнай өндіру көлемін арттыруға мүмкіндік алғанын жазған еді. Сарапшылар бұл қадамның экономикаға ықпалына да баға берген болатын.
