Қазақстан Польшаға тауар жеткізу көлемін арттырды, деп хабарлайды LS.
Биыл қаңтар-шілде аралығында Қазақстан мен Польша арасындағы тауар айналымы $800 млн- ға жуықтады. Бұл былтырғы көрсеткіштен 19,2%-ға жоғары.
Қазақстанның Польшаға экспорты 1,5 есе өсіп, 3,3 млн тоннаға жетті. Ал оның жалпы құны 1,6 есе артып, $436,6 млн болды.
Польшаға 2,9 млн тонна тас көмір және одан өндірілетін отын экспортталды. Бұл өткен жылмен салыстырғанда 45%-ға көп. Сонымен қатар 131,8 мың тонна мұнай, 29,3 мың тонна тыңайтқыш, 40,9 мың тонна пропилен полимерлері және 9,7 мың тонна фосфор жеткізілді.
Сонымен қатар майлы дақылдар тұқымының экспорты 2,2 есе артып, 92,2 мың тоннаға жетті. Жаңа және мұздатылған балық экспорты 28,5%-ға өсіп, 664,1 тоннаны құрады. Ал тұздалған, ысталған және кептірілген балық 1,6 есе көбейіп, 78,3 тоннаға жетті.
Қазақстаннан Польшаға 247,9 тонна жаңа және салқындатылған сарымсақ жөнелтілді. Бұл өткен жылмен салыстырғанда 5%-ға көп.
Ал өңделмеген алюминий экспорты, керісінше, 2,7 есе азайып, 11,6 мың тоннаны құрады.
Польшадан импорт азайды
Польшадан Қазақстанға импорт та азайған. Оның көлемі 8,6%- ға төмендеп, 90,2 мың тоннаны құрады. Ақшалай есепте импорт 8,8%-ға азайып, $361,1 млн болды.
Польшадан Қазақстанға техника да аз әкелінді. Адаптерлер мен Wi-Fi роутерлерінің импорты 1,6 есе азайып, 2,6 мың дана болды. Ал компьютерлер мен серверлерге арналған құрылғылар 23,8%-ға азайып, 252 дананы құрады.
Польшадан косметика мен парфюмерия 956,6 тонна көлемінде жеткізілді. Бұл өткен жылмен салыстырғанда 1,8 есе аз. Монтаж көбігі мен шпатлевка 20,9%-ға төмендеп, 2,7 мың тоннаға, ал тұрмыстық акрил желімі 13,6%-ға азайып, 1,8 мың тоннаға жетті.
Азық-түлік өнімдері арасында мұздатылған картоп фри мен картоптан жасалған домалақ өнімдерді әкелу 1,6 есе азайып, 3,2 мың тоннаны құрады. Ал дайын таңғы ас, дәнді дақылдардан жасалған тіскебасарлар мен қытырлақ картоп өнімдерінің импорты 9%-ға төмендеп, 1,6 мың тонна болды.
Польшадан Қазақстанға алма жеткізілімі 6%-ға көбейіп, 47,9 мың тоннаға жетті. Сыра импорты да айтарлықтай өсіп, 6,3 есе артып, 636 мың литр болды.
Бұдан бөлек, Қазақстан Польшадан алты жылқы әкелді. Өткен жылы бұл елден жылқы импортталмаған.
