Ауыл шаруашылығы вице-министрі Азат Сұлтанов елде ет тапшылығы болмайтынын айтты, деп хабарлайды LS.
"Біз қазір Орталық Азия елдерінде қазақстандық етке деген сұраныстың айтарлықтай өскенін байқап отырмыз. Жылқы еті мен қазы-қарта үшін Еуропа нарықтары ашылып келеді, Қытаймен ынтымақтастық та қарқын алған. Түркия да біз үшін тартымды бағыттардың бірі, өйткені ол жақта сиыр етіне сұраныс жоғары әрі баға да қымбат. Осы ретте біздің басты міндетіміз – сыртқы сұраныстың ішкі нарықтағы бағаға әсер етпеуін қамтамасыз ету. Бұған қалай қол жеткіземіз? Мал басын арттыру арқылы. Бұл бағытта барлық қажетті шаралар қабылданады. Биыл асыл тұқымды және тауарлық мал сатып алуға арналған жеңілдетілген қаржыландыру бағдарламасын іске қосып отырмыз", – деді ол.
Вице-министрдің айтуынша, дәстүрлі нарықтардан асыл тұқымды мал сатып алуға арналған субсидия нормативтері де ұлғайтылған.
"Бұл шаралардың барлығы малдың барлық түрі бойынша бас санын бірнеше есе көбейтіп, ішкі нарықты толық қамтамасыз етуге мүмкіндік береді. Сондықтан Қазақстан сиыр етін жаппай импорттайды деу негізсіз. Импорт бар, бірақ өте аз және көбіне консерві өнімдерін шығару үшін пайдаланылатын блокты ет түрінде ғана әкелінеді. Отандық ауыл шаруашылығы өндірушілері сиыр етін көп көлемде импорттап отырған жоқ. Көбіне премиум стейктерге арналған ет пен қайта өңдеуге қажет блокты ет қана әкелінеді", – деп атап өтті А. Сұлтанов.
Оның айтуынша, мал шаруашылығы елде қарқынды дамып келе жатқан сала болып қала береді.
"Өкінішке қарай, мал шаруашылығы қазір біз күткен деңгейде дамып жатқан жоқ. Сондықтан мемлекет басшысы осы саланы кешенді түрде дамытуға арналған жаңа бағдарламаны дайындап, бекітуді тапсырды. Бұл бағдарламада өндіріс көлемін, соның ішінде ет өндіруді арттыруға қатысты нақты көрсеткіштер мен жоспарлар белгіленеді. Барлық бағыттар мемлекеттік қолдаумен қамтылады. Яғни бағдарлама тек сиыр етін өндіруді ғана емес, қоян өсіруден бастап марал шаруашылығына дейінгі салаларды да қамтиды", – деп түйіндеді вице-министр.
Бұған дейін, бірнеше облыста жұмыртқа мен ет өндірісінің төмендегені хабарланған болатын.
Сонымен қатар, Қазақстанда ет импортына кедендік бажды нөлге түсіру бастамасынан бас тарту ұсынылды.
Елге әкелінетін шошқа және жылқы еті көлемінің артқаны да айтылған.
Ауыл шаруашылығы министрлігінің мәліметіне сүйенсек, Қазақстанда мал басы өсіп келеді. Дегенмен еттің қымбаттауына жем-шөп бағасының қымбаттауы және тарифтердің артуы негізгі себеп болып отыр.
