Қазақстан шетелден электр энергиясын экспорт көлемімен салыстырғанда әлдеқайда жоғары бағамен сатып алады, деп хабарлайды LS.
2025 жылы Қазақстанда 123,6 млрд кВт⋅сағ электр энергиясы өндірілді, бұл өткен жылмен салыстырғанда 4,2%-ға жоғары.
Экспорт көлемі 24,4%-ға артып, 3 млрд кВт⋅сағ-қа жетті. Нәтижесінде ел $71,1 млн табыс тапты.
Электр энергиясының негізгі бөлігі Ресейге жөнелтілген – 2,1 млрд кВт⋅сағ (+39,6%). Сондай-ақ, Қырғызстанға 890,1 млн кВт⋅сағ (-1,6%) жеткізілді.
Импорт көлемі де 6,8%-ға артып, 5,1 млрд кВт⋅сағ-қа жетті. Шетелден сатып алынған электр энергиясы елге $398,7 млн-ға түсті.
Негізгі жеткізуші – Ресей, одан 4,3 млрд кВт⋅сағ электр энергиясы сатып алынған (-4,9%). Сонымен қатар, Өзбекстаннан 522,2 млн кВт⋅сағ (3 есе өсім), ал Қырғызстаннан 302,3 млн кВт⋅сағ (3 есе өсім) электр энергиясы импортталған.
Деректерге сәйкес, Қазақстан электр энергиясын экспортқа қарағанда әлдеқайда қымбат бағамен сатып алады. Орта есеппен 1 млн кВт⋅сағ импорт құны $78 мың болса, экспорттағы дәл осы көлем шамамен $23,7 мың деңгейінде. Айырмашылық 3,3 еседен асады.
2026 жылдың қаңтар-ақпан айларында жағдай өзгерген. Бұл кезеңде электр энергиясын өндіру 22,4 млрд кВт⋅сағ-қа жетіп, 1,4%-ға өскен.
Экспорт көлемі 1,6 есеге қысқарып, 371,6 млн кВт⋅сағ болды. Осы кезеңде түскен табыс $8,7 млн-ды құрады. Негізгі жеткізілім Ресейге бағытталған – 369,5 млн кВт⋅сағ. Ал Қырғызстанға экспорт күрт азайып, 2,1 млн кВт⋅сағ деңгейінде қалған.
Импорт көлемі керісінше 13%-ға өсіп, 674,2 млн кВт⋅сағ-қа жетті. Бұл шығын $69,5 млн-ды құрады. Оның басым бөлігі Ресейден алынған электр энергиясына тиесілі – 673,8 млн кВт⋅сағ.
Сонымен қатар, ішкі нарықта тарифтердің өсуі тіркелді. 2026 жылдың наурызында электр энергиясының бағасы 2025 жылдың сәйкес кезеңімен салыстырғанда 7,6-15% аралығында қымбаттаған (тұтыну деңгейіне байланысты).
Ең жоғары тарифтер Орал қаласында тіркелді – 100 кВт⋅сағ үшін 3 169-5 053 теңге (+19- 20%), сондай-ақ, Қостанайда – 3 289-5 250 теңге (+22- 23%).
