Қазақстан президенті Қасым-Жомарт Тоқаев 2022-2024 жылдарға арналған республикалық бюджетке қол қойды. LS инфографикада келесі жылы қандай кірістер мен шығыстар болатынын талдап көрдi.
Республикалық бюджеттің кірістері 2022 жылы 12,8 трлн теңгені құрайды. Оның ішінде салықтық түсімдер – 8,9 трлн теңге және салықтық емес түсімдер – 286 млрд теңге. Сондай-ақ, Ұлттық қордан трансферттер – 3,6 трлн теңге.
Сонымен қатар, шығындар 15,6 трлн теңгеге жетті, оның ішінде әлеуметтік көмек пен қамтамасыз етуге – 4,3 трлн теңге, жергілікті бюджеттерге трансферттер – 2,1 трлн теңге, білім беруге – 1,9 трлн теңге, денсаулық сақтауға – 1,8 трлн теңге.
Атап айтқанда, президент әкімшілігіне 2022 жылы 9,2 млрд теңге жұмсалады. Премьер-министрдің кеңсесі өз кезегінде жалпы сипаттағы мемлекеттік қызметтерге жұмсалатын шығындар аясында 3,4 млрд теңге алады. Ал үкімет резервіне 105,5 млрд теңге бағытталмақ.
2022 жылы президенттің Іс басқаруына жұмсалатын шығындар 143,7 млрд теңгеге жетті, оның ішінде мемлекеттік функциялар мен өкілеттіктерді қамтамасыз етуге – 61,7 млрд теңге және осы ұйымның объектілерін салуға және реконструкциялауға – 50,2 млрд теңге.
Бұдан басқа, 2022 жылы сапалы мектеп біліміне қолжетімділікті қамтамасыз етуге 1,1 трлн теңгеден астам қаражат жұмсалады. Ал 1,2 трлн теңге – тегін медициналық көмектің кепілдік берілген көлемін қамтамасыз етуге бағытталады.
Сондай-ақ, жалпы пайдаланымдағы автомобиль жолдарын жөндеуге және олардың сапасын жақсартуға 253,1 млрд теңге жұмсалмақ.
Республикалық бюджеттен жергілікті бюджеттерге берілетін субвенция – трансферттерге келетін болсақ, 2022 жылы Түркістан облысы ең көп алатын болады – 402,3 млрд теңге. ШҚО – 217 млрд теңге, Жамбыл облысы –194,4 млрд теңге астам, Қызылорда облысы –184,3 млрд теңге және Алматы облысы –180,4 млрд теңге.
Осылайша, қазына тапшылығы 2,9 трлн теңгені немесе ЖІӨ-нің 3,3%-ын құрайды.
Инфографикада 2022 жылға арналған республикалық бюджеттің кірістері мен шығыстары туралы толық ақпарат көрсетілген.
