Қарағанды облысында тағы бір ферроқорытпа өндірісі іске қосылды, деп хабарлайды LS.
Өңірлік әкімдіктің ақпаратына сәйкес, Қарағандыда агломерациялық фабрикасы бар Сарыарқа ферроқорытпа зауыты пайдалануға берілді. Бұл өңірде іске қосылған екінші ұқсас өндіріс.
"Жоба Қазақстанның Даму банкінің қаржылық қолдауымен жүзеге асырылды. Қаржы құны – 38,8 млрд теңге. 11 млрд теңге – бұл компанияның өз қаражаты", - делінген хабарламада.
Кәсіпорында әрқайсысы 8 МВт болатын сегіз пеш орнатылады. Бірінші кезеңде төрт пеш пайдалануға берілді, қалғандары жыл соңына дейін іске қосылады. Өндіріс қуаттылығы 57 мың тонна ферроқорытпа мен 240 мың тонна агломератты құрайды.
"Зауытта 300 адам жұмыс істейді", - деді өңір басшысы Жеңіс Қасымбек.
Бұған дейін, LS редакциясы аймақта шетелдік инвесторлардың қатысуымен үш ірі өндіріс салынып жатқанын жазған болатын. Мысалы, 40 млрд теңгеге арнайы кокс өндіретін зауыт іске қосылады. Кәсіпорында ферроқорытпа өндірісі үшін 400 мың тонна қалпына келтіргіш, 70 мың тонна көмір шайыры мен көмір майын шығару жолға қойылады.
Анықтама
Арнайы кокс ферроқорытпалар мен таза кремний өндірісінде тотықсыздандырғыш ретінде қолданылады. Қазақстанның тау-кен өндіру және тау-кен металлургия кәсіпорындары қауымдастығының бағалауы бойынша ішкі қажеттіліктер жылына миллион тоннадан астам құрап отыр. Бүгінгі таңда бұл өнім Ресей мен Қытайдан үлкен көлемде импортталады.
